សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ បានលើកទឹកចិត្តឱ្យប្រជាពលរដ្ឋយកកូនជាមធ្យម ៥ ទៅ ៦ នាក់ក្នុងមួយគ្រួសារ ។
ឃ្លាមួយរបស់សម្ដេចបានលើកឡើងថា បច្ចុប្បន្នកម្ពុជាមានប្រជាជនសរុប ១៥,២ លាននាក់ ដែលចំនួននេះនៅតិចនៅឡើយ ព្រោះទឹកដីកម្ពុជានៅធំ គួរតែ ១៥ លានពីរដងទើបគ្រប់ ។ ដូច្នេះមានន័យថា ប្រទេសកម្ពុជាគួរតែមានប្រជាជនជាង ៣០ លាននាក់ ។
សម្ដេចក្រឡាហោម ស ខេង បានលើកឡើងថា ពិភពលោកកំពុងតែមានការព្រួយបារម្ភអំពីកំណើនប្រជាជន ព្រោះនៅបណ្ដាប្រទេសជឿនលឿនមួយថ្ងៃៗរវល់ធ្វើការ គ្មានពេលគិតគូររឿងកូនទេ ។
ចំពោះប្រជាជនកម្ពុជាវិញ គួរយកកូនឱ្យបានច្រើន តែបើច្រើនពេកក៏មិនល្អដែរ ត្រឹម ៥ ទៅ ៦ នាក់សមល្មមហើយ ។ ចំនួនប្រជាជនកម្ពុជាមានចំនួនតិចនេះ គឺដោយសារកាលពីសម័យបនប្រល័យពូជសាសន៍ប្រជាជនខ្មែរត្រូវបានសម្លាប់ ហើយនៅសល់ប្រមាណតែជាង ៥ លាននាក់ប៉ុនណោះ ៕ ប្រភព៖ ប្រជាប្រិយ
