ភ្នំពេញ៖ ដើម្បីរក្សាបាននូវបរិស្ថាន ក៏ដូចជាអាកាសាធាតុល្អ មិត្តចិន តាមរយៈក្រុមមហ៊ុន Beijing Fushide Investment Management Ltd and East Consulting Management Ltd មានគម្រោងវិនិយោគ លើវិស័យ ដាំដើមឈើឡើងវិញ នៅកម្ពុជា។ នេះបើយោងតាមបណ្ដាញ ទំនាក់ទំនងសង្គមហ្វេសប៊ុក របស់ក្រសួងកសិកម្ម។
ថ្លែងនៅក្នុងជំនួបពិភាក្សាការងារ ដើម្បីស្វែងយល់ ពីឱកាសវិនិយោគ លើវិស័យកសិកម្មនៅកម្ពុជា ជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៧ ខែមេសា ឆ្នាំ២០១៩ ប្រធានក្រុមមហ៊ុន Beijing Fushide Investment Management Ltd and East Consulting Management Ltd បានឲ្យដឹងថា” ក្រុមហ៊ុនលោក មានមុខជំនួញជាច្រើន ហើយចំពោះមុខនេះ លោកមានបំណងចង់វិនិយោគ លើវិស័យដាំឈើ ដើម្បីនាំទៅប្រទេសចិន” ។
ជាការឆ្លើយតប លោករដ្ឋមន្រ្តីបានស្វាគមន៍ ចំពោះគម្រោង ចង់វិនិយោគលើវិស័យកសិកម្ម ព្រមទាំងបានបញ្ជាក់ថា នៅកម្ពុជាមានសក្តានុពលយ៉ាងខ្លាំង សម្រាប់ការវិនិយោគ ជាពិសេសការវិនិយោគ លើការដាំឈើឡើងវិញ ការកែច្នៃផលិតផលកសិកម្ម ការដាំដុះនៅមុខដំណាំផ្សេងៗ និងការចញ្ចឹមសត្វ ឬចញ្ចឹមត្រីជាដើម ដែលទាំងអស់នេះ គឺមានសក្តានុពល ក្នុងការវិនិយោគ ដែលអាចធ្វើការនាំចេញ មកប្រទេសចិន ឬទីផ្សារក្នុងប្រទេសអាស៊ាន ក៏ដូចជាទីផ្សារអឺរ៉ុប និងអាមេរិក ផងដែរ។
លោករដ្ឋមន្ត្រី ក៏បានអញ្ជើញក្រុមហ៊ុន ឱ្យមកប្រទេសកម្ពុជា ដើម្បីសិក្សាឱ្យបានល្អដើម្បី ឱ្យដំណើរការបានល្អ។
លោករដ្ឋមន្ត្រី បានលើកឡើងទៀតថា ករណីក្រុមហ៊ុនចង់វិនិយោគលើការដាំឈើនេះ គឺក្រុមហ៊ុនត្រូវសហការ ជាមួយក្រុមហ៊ុនចិន ដែលមានដីស្រាប់ដើម្បី សហការដាំដុះប្រភេទឈើថ្មី នេះដើម្បីនាំចេញ ដោយសារពេលនេះ យើងមិនមានការផ្តល់ ដីសម្បទានសេដ្ឋកិច្ចទៀតទេ។ ក្រុមហ៊ុនក៏អាចសហការ ជាមួយក្រុមហ៊ុនក្នុងស្រុក ដើម្បីសហការក្នុងការដាំ និងប្រមូលទិញដើម អាកាស្យាផងដែរ សម្រាប់ធ្វើការកែច្នៃ។
ក្រៅពីម្រោងវិនិយោគលើវិស័យ ដាំដើមឈើឡើងវិញ លោកប្រធានក្រុមហ៊ុន ក៏មានការចាប់អារម្មណ៍ លើការដាំកៅស៊ូផងដែរ ដោយចង់ធ្វើការកែច្នៃ ជាសំបករថយន្តសម្រាប់នាំចេញ។
ជាការឆ្លើយតប លោករដ្ឋមន្ត្រីបានបញ្ជាក់ថា ផ្ទៃដីកៅស៊ូនៅកម្ពុជាមានប្រមាណ ៤៥ម៉ឺន ហត តែតម្លៃកៅស៊ូបច្ចុប្បន្នមានតម្លៃទាប និងមានបញ្ហាច្រើន ដូច្នេះសូមឱ្យក្រុមហ៊ុន ទៅទស្សនកិច្ចនៅកម្ពុជា ដើម្បីពិនិត្យ ពីលទ្ធភាពវិនិយោគ ៕ ដោយ: បាន ធារ៉ូ DapNews
