ជារឿងដ៏គួរឱ្យសោកសង្រេង និង សោកស្ដាយបំផុតចំពោះក្រុមគ្រួសារសព ទាក់ទិនទៅនឹងករណីកុមារីកំពុងពេញស្រឡាញ់មួយរូបបានជួបគ្រោះថ្នាក់នៅក្នុងហេតុការណ៍ស្មានមិនដល់មួយ ដោយត្រូវរានទេវតា ឬ ប្រភូមិធ្លាក់ពីលើបណ្ដាលឱ្យបាត់បង់ជីវិតចាកចោលក្រុមគ្រួសារជាទីស្រឡាញ់ទាំងវ័យក្មេង។
ចំពោះករណីនេះ ស្រ្តីដែលមានគណនីហ្វេសប៊ុកឈ្មោះ Na Ti Kan ត្រូវជាម្ដាយមីងសពបានបង្ហោះរូបក្មួយស្រីជាជនរងគ្រោះ ព្រមទាំងរៀបរាប់ដោយក្ដីសង្វេគបែបនេះថា ៖ «ថ្ងៃនេះខ្ញុំសុំកាន់ទុក្ខ ព្រោះក្មួយជាទីស្រឡាញ់បាត់បង់ជីវិតមួយប៉ប្រិចភ្នែក មីងទទួលយកស្ទើរតែមិនបាន។ ក្មួយស្រីរបស់មីង មីងមិនទាន់ទាំងបានជួបមុខក្មួយម្ដងផងហេតុអ្វីហេតុអ្វី? ក្មួយទៅចោលប៉ាម៉ាក់ និង គ្រប់គ្នា ហេតុអ្វី ក៏ក្មួយអាយុខ្លីម្ល៉េះ»។ ស្ត្រីដែលមានគណនីហ្វេសប៊ុកឈ្មោះ Na Ti Kan ខាងលើ ក៏បានបញ្ជាក់ពីមូលហេតុតាមរយៈខមមិនឱ្យដឹងផងដែរថា ក្មេងស្រីបានបាត់បង់ជីវិត ព្រោះតែត្រូវរានទេវតាបាក់រលំលើ។
ចំពោះរឿងសោកសង្រេងនេះ តាមរយៈគណនីដែលជាឪពុករបស់សព មានឈ្មោះ Korng ក៏បានបង្ហោះរូបជាមួយកូនស្រីជាទីស្រឡាញ់ជាលើកចុងក្រោយ រៀបរាប់ដោយក្ដីឈឺចាប់បែបនេះថា ៖ «កូនមាសឪពុក ឪពុកសូមជូនពរកូនទៅកាន់សុគតិភព កើតជាតិណាៗកុំឱ្យអាយុខ្លីដូចជាតិនេះទៀត»៕
