ខេត្តក្រចេះ ៖ ពលរដ្ឋ​ជនជាតិ​ខ្មែរ​ប្រុស​ស្រី​ក្មេង​ចាស់​ចំនួន​២៤​នាក់ សុទ្ធសឹងតែ​រស់នៅ ក្បែរ​តំបន់​ព្រំដែន​វៀតណាម​ត្រូវ​បាន​អាជ្ញារ​ធរ​វៀតណាម​ចាត់​បញ្ជូន​មក​ទឹកដី​កម្ពុជា​វិញ ក្រោយ​ពី​អាជ្ញាធរ​វៀតណាម​រក​ឃើញ​ថា ពលរដ្ឋ​ទាំងនោះ​បាន​រំលោភ​បទបញ្ញត្តិ​ព្រំដែន​ដោយ លួច​ចូល​ក្នុង​ទឹកដី​វៀតណាម​ដោយ​ខុសច្បាប់ ។

នគរបាល​វរៈ​ការពារ​ព្រំដែន​បាន​ឲ្យ​ដឹង​ថា ពលរដ្ឋ​ខ្មែរ​ទាំង​២៤​នាក់ គឺ​សុទ្ធសឹងតែ​រស់នៅ តាម​ភូមិ​មួយ​ចំនួន​ក្នុង​ឃុំ​២ ធ្នូ ក្បែរ និង​តំបន់​ព្រំដែន​ប្រទេស​វៀតណាម ។ ហើយ​ពលរដ្ឋ​ទាំងនេះ​ត្រូវ​បាន​ខាង​ភាគី​វៀតណាម​ចាត់​បញ្ជូន​មក​វិញ តាម​ច្រកព្រំដែន​អន្តរជាតិ​នៅ​ថ្ងៃ​ទី​០២ តុលា បន្ទាប់​ពី​ពួក​គាត់​បាន​នាំ​គ្នា​លួច​ឆ្លង​ដែន​ចូល​ទៅ​ក្នុង​ព្រះ​វិហារ​យា​ស៊ូ​គ្រឹះ​ក្នុង​ទឹកដី​វៀតណាម ចម្ងាយ​ជាង​៦​គីឡូ​មែ​ត្រ​ពី​ព្រំដែន​កម្ពុជា ដើម្បី​ទៅ​ទទួល​អំណោយ​នៅ ព្រះ​វិហារ​គ្រឹះ​សាសនា​មួយ​នោះ ។

នាយ​ប៉ុស្តិ៍​នគរបាល​ការពារ​ព្រំដែន​ត្រពាំង​ស្រែ​លោក​អនុសេនីយ៍ឯក ឃុន ម៉​ន បាន ប្រាប់​ឲ្យ​ដឹង​ថា ក្រោយ​ពី​មានការ​លួច​ចូល​ដោយ​ខុសច្បាប់ ពលរដ្ឋ​ខ្មែរ​ទាំងនោះ​ត្រូវ​បាន​អាជ្ញា ធរ​វៀតណាម​ចាត់​បញ្ជូន​មក​វិញ​ភ្លាម​ៗ ។ លោក​ថា កន្លង​មក​ពលរដ្ឋ​ដែល​រស់នៅ​តាម​ភូមិ​ក្បែរ ព្រំដែន​ក្នុង​ឃុំ​២​ធ្នូ គឺ​តែងតែ​មានការ​ទំនាក់ទំនង​ជាមួយ​ពលរដ្ឋ​ក្បែ​ព្រំដែន​ខាង​ភាគី​វៀតណាម និង​បាន​ចេញចូល​តាម​ច្រករបៀង​ផ្សេង​ៗ ។

លោក​អនុសេនីយ៍ឯក ឃុន ម៉​ន បាន​ឲ្យ​ដឹង​ទៀត​ថា ពលរដ្ឋ​ទាំងនេះ​ត្រូវ​បាន​អាជ្ញាធរ វៀតណាម​បាន​ចាត់​បញ្ជូន​ពីរ​លើក​មក​ហើយ ក្រោយ​ពី​ពួក​គាត់​បាន​ព្យាយាម​នាំ​គ្នា​លួច​ចូល ទៅ​ព្រះ​វិហារ​យា​ស៊ូ​គ្រឹះ​ក្នុង​ទឹកដី​ប្រទេស​វៀតណាម ។

លោក​អះអាង​ថា នគរបាល និង​រៀបចំ​បើក​វេទិកាសាធារណៈ​មួយ​អញ្ជើញ​ពលរដ្ឋ​នៅ តាម​ព្រំដែន​មក​ចូលរួម ដើម្បី​ផ្សព្វផ្សាយ​បទបញ្ញត្តិ​ព្រំដែន ដើម្បី​កុំ​ឲ្យ​ពួក​គាត់​ចូល​ក្នុង​ទឹកដី ប្រទេស​គេ​ដោយ​ខុសច្បាប់​បែប​នេះ​ទៀត។

ដោយឡែកថ្មីៗនេះ អភិបាលខេត្តកំពង់ឆ្នាំង នៅ​ថ្ងៃ​ទី​១ ខែតុលា ឆ្នាំ​២០១៨ នេះ ដល់​ពេលវេលា​ដែល​អាជ្ញាធរ និង​សមត្ថកិច្ច​ពាក់ព័ន្ធ​ទាំងអស់ ចាប់ផ្ដើម​បម្លាស់​ទី​ជនជាតិ​វៀតណាម ចំនួន​២.៣៩៧​គ្រួសារ ដែល​រស់នៅ​លើ​ផ្ទះ​បណ្ដែត​ទឹក នៅ​តាម​ដង​ទន្លេសាប នៅ​ទូទាំង​ខេត្ត​កំពង់ឆ្នាំង ឱ្យ​មក​នៅ​រស់​នៅ​លើ​គោក​វិញ ហើយ​បើ​មាន​ការតវ៉ា​ពី​ក្រុម​ជនជាតិ​វៀតណាម អាជ្ញាធរ​នឹង​ប្រើប្រាស់​វិធានការ រដ្ឋបាល យ៉ាង​តឹងរ៉ឺង​បំផុត​។​

​អភិបាលខេត្ត​កំពង់ឆ្នាំង លោក ឈួ​រ ច័ន្ទ​ឌឿ​ន បានបញ្ជាក់​ថា យុទ្ធនាការ​នេះ​បាន​អនុវត្ត និង​ជូនដំណឹង​តាំងពី​ឆ្នាំ​២០១៥ មកម្ល៉េះ ហើយ​ការរុះរើ​ស​ជនជាតិ​វៀតណាម ឱ្យទៅ​នៅ​លើ​គោក​នេះ មាន​កិច្ចសហការ​ជាមួយ​សមាគម​វៀតណាម នៅ​កម្ពុជា ព្រោះ​សមាគម​វៀតណាម បាន​សហការ​ជាមួយ​ដៃគូរ​ឯកជន ដើម្បី​ផ្ដល់​ទីតាំង​សម្រាប់​តាំង​លំនៅឋាន របស់​ជនជាតិ​វៀតណាម ទាំងនោះ​។

កន្លែង​ដែល​ជនជាតិ​វៀតណាម​រស់នៅ​ច្រើនជាងគេ គឺ​នៅ​ផ្សារ​ក្រោម សង្កាត់​កំពង់ឆ្នាំង និង​នៅ​តំបន់​ឆ្នុកទ្រូ ស្ថិតក្នុង​ឃុំ​ឆ្នុក​ទ្រូ ស្រុក​បរិបូរណ៌ ហើយ​ក្រៅពី​នោះ​នៅ​ស្រុក​កំពង់ត្រឡាច និង​តំបន់​ផ្សេងៗ​ទៀត​។ ការរុះរើ​លំនៅឋាន​របស់​បងប្អូន​ជនជាតិ​វៀតណាម ក្នុងន័យ​ដើម្បី​លើកកម្ពស់​សោភ័ណភាព​បរិស្ថាន និង​បញ្ហា​សុខភាព​អនាម័យ ព្រោះ​ថា​ការរស់នៅ​លើទឹក​នេះ ធ្វើឲ្យ​ប៉ះពាល់​បរិស្ថាន​យ៉ាងខ្លាំង ពិសេស​ការប្រកប​អាជីវកម្ម​ផ្សេងៗ​ធ្វើឲ្យប៉ះពាល់​ដល់​ទឹក ហើយ​យក​ទឹក​នោះមក​ប្រើ​វិញ គឺ​អាច​ប្រឈម​ជាមួយ​បញ្ហា​សុខភាព​។​

​លោក​បាន​បន្ថែមថា កន្លងទៅ នៅពេល​អាជ្ញាធរ ចេញ​សេចក្ដីជូនដំណឹង និង​នៅ​ពេល​អនុវត្ត​ការងារ​នេះ ក៏​មាន​ការតវ៉ា​ពី​ក្រុម​ជនជាតិ​វៀតណាម ប៉ុន្ដែ​អាជ្ញាធរ​បាន​ប្រើប្រាស់​វិធានការ រដ្ឋបាល យ៉ាង​តឹងរ៉ឺង​បំផុត ដើម្បី​បន្ដ​អនុវត្ត​ការងារ​នេះ ឲ្យមាន​ប្រសិទ្ធភាព​ខ្ពស់​។​

​អភិបាលខេត្ត បានបញ្ជាក់​ថា ជនជាតិ​វៀតណាម​ទាំងអស់នោះ ត្រូវ​នៅ​ឆ្ងាយ​ពី​កន្លែងចាស់​ប្រមាណ​១​គីឡូម៉ែត្រ ហើយ​ខ្លះ​ទៀត ត្រូវ​កំណត់​ឲ្យទៅ​រស់នៅ​ឃុំ​ស្វាយជ្រំ ស្រុក​រលាប្អៀ ដោយ​មាន​ទំហំ​ដី​៤០​ហិកតា ដែល​ផ្ដល់​ដោយ​សមាគម​វៀតណាម សហការ​ពី​ដៃគូរ​ឯកជន ដោយ​ជួល​ឲ្យ​គាត់​គេ​រស់នៅ​៕