– ការកែប្រែទិន្នន័យ​អត្តសញ្ញាណ​ មិន​អស់លុយ (បើមាន​ភាព​មិន​ប្រក្រតី​អាច​ដាក់​ពាក្យ​ប្ដឹង​មក នាយកដ្ឋាន​អត្តសញ្ញាណកម្ម)

– អ្នក​នៅ​ខេត្ត​កែ​ទិន្នន័យ​គិត​ជាមធ្យម ២០ថ្ងៃ ឯអ្នក​នៅ​រាជធានី ១០ថ្ងៃ (ការកែអត្តសញ្ញាណ​មិន​ខុស​ស្ថានភាពដើម)

– ការ​កែទិន្នន័យ​អត្តសញ្ញាណ​មិន​ខុសអត្តសញ្ញាណដើម ធ្វើ​ឡើង​នៅពីរទីតាំង

អគ្គនាយក​នៃ​អគ្គនាយកដ្ឋាន​អត្តសញ្ញាណកម្ម​បាន​ប្រាប់​​ Sabay ថា ការ​កែ​ប្រែ​ទិន្នន័យ​អត្តសញ្ញាណ​បណ្ណ មិន​តម្រូវ​ឲ្យ​បង់​ប្រាក់​នោះ​ទេ ប៉ុន្តែ ព្រួយបារម្ភ​រឿង​រយៈពេល​ប្រគល់​ជូន​ប្រជាពលរដ្ឋ​ព្រោះ​មួយ​រយៈ​នេះ មាន​អ្នក​មក​កែ​តម្រូវ​ច្រើន​ខ្លាច​ធ្វើ​មិន​ទាន់​កាល​កំណត់។

ឯកឧត្ដម នាយ​ឧត្ដមសេនីយ៍ ម៉ៅ ច័ន្ទតារា អគ្គនាយក​នៃ​អគ្គនាយកដ្ឋាន​អត្តសញ្ញាណកម្ម មាន​ប្រសាសន៍​ថា ប្រសិន​បើ​ប្រជាពលរដ្ឋ​ចង់​ស្នើ​សុំ​កែ​តម្រូវ​ទិន្នន័យ ដែល​មិន​ប្រែប្រួល​ស្ថានភាព​អត្តសញ្ញាណ​ដើម គឺ​អាច​ដាក់​ពាក្យ​ស្នើ​សុំ​នៅ សាលា​ក្រុង ស្រុក ខណ្ឌ នៃ​ទីតាំង​ដែល​បញ្ជី​អត្រានុកូលដ្ឋាន​របស់​សាមី​ខ្លួន​បាន​នឹង​កំពុង​រក្សា​ទុក ឬ អាច​មក​ផ្ទាល់​នៅ នាយកដ្ឋាន​អត្រានុកូលដ្ឋាន នៃ​អគ្គ​នាយកដ្ឋាន​អត្តសញ្ញាណកម្ម ក្រសួង​មហាផ្ទៃ ​ដែល​មាន​អាសយដ្ឋាន​នៅ​ផ្លូវ​ជាតិ​លេខ១ សង្កាត់​និរោធ ខណ្ឌ​ច្បារ​អំពៅ រាជធានី​ភ្នំពេញ។ ប៉ុន្ដែ ប្រសិន​បើ​ចង់​កែ​តម្រូវ​ទិន្នន័យ​ណាមួយ​ខុស​ពី​អត្តសញ្ញាណ​ដើម ត្រូវ​ដាក់​ពាក្យ​ប្ដឹង​ទៅ​តុលាការ​ជាមុន​សិន។

«បើ​បងប្អូន​គ្រាន់​តែ​ខុស​ឈ្មោះ​ ឬ​​ភេទ អាច​មក​ធ្វើ​ការ​កែ​តម្រូវ​បាន​នៅ​ពីរ​ទីតាំង​ខាង​លើ ដោយ​អត់​អស់​ប្រាក់​នោះ​ទេ។ តែ​បើ​ខុស​ស្ថានភាព​អត្តសញ្ញាណ​​ដើម ត្រូវ​ដាក់​ពាក្យ​ប្ដឹង​ទៅ​តុលាការ​។ ខ្ញុំ​ឧទាហរណ៍ គាត់​ចង់​កែ​ប្រែ​ឆ្នាំ​កំណើត​ ខុស​នឹង​ឯក​សារ​ដើម ដូចជា កើត​នៅ​ឆ្នាំ ១៩៥០ កែ​មក​១៩៧០ អាហ្នឹង! ត្រូវ​ដាក់​ប្ដឹង​ទៅ​តុលាការ​ហើយ ឬ​កែ​ឈ្មោះ ខុស​នឹង​ឯកសារ​ដើម​ជាដើម»។ នាយ​ឧត្ដមសេនីយ៍ ម៉ៅ ច័ន្ទតារា បញ្ជាក់​បន្ថែម។

ទាក់ទង​នឹង​រយៈពេល​នៃ​ការ​កែ​តម្រូវ​ទិន្នន័យ​អត្តសញ្ញាណ អគ្គនាយក​នៃ​អគ្គនាយកដ្ឋាន​អត្តសញ្ញាណកម្ម បាន​លើក​ឡើង​ថា តាម​ធម្មតា ប្រសិន​បើ​ប្រជាពលរដ្ឋ​នៅ​តាម​បណ្ដា​ខេត្ត​ចង់​ស្នើ​កែ​ប្រែ​ទិន្នន័យ ត្រូវ​ប្រើ​រយៈ​ពេល​ ២០ ថ្ងៃ ឯ​អ្នក​រស់​នៅ​រាជធានី​ប្រមាណ​ជា ១០ថ្ងៃ។ ប៉ុន្ដែ រយៈពេល​នេះ​អាច​យូរ​ជាង​ហ្នឹង ដោយសារ​តែ ក្រុមការងារ​ត្រូវ​ការ​ផ្ទៀងផ្ទាត់​ឯកសារ​ច្រើន​ទៅ​តាម​សាមីខ្លួន ស្រប​ពេល​អ្នក​មក​ស្នើសុំ​កែ​ច្រើន​ដែរ។

គិត​ត្រឹម​ត្រី​មាស​ទី១ ដើម​ឆ្នាំ ២០១៨​នេះ ប្រជាពលរដ្ឋ​បាន​មក​កែ​ទិន្នន័យ​អត្តសញ្ញាណ​បណ្ណ មាន​ចន្លោះពី ៦ ទៅ ៧ពាន់​នាក់។ ឯក​ឧត្តម ម៉ៅ ច័ន្ទតារា បាន​បញ្ជាក់។

ការ​កែ​ទិន្នន័យ​អត្តសញ្ញាណ ដោយ​មិន​គិត​ថ្លៃ​នេះ មាន​រយៈ​ពេល​ ២ឆ្នាំ គិត​ពី​ឆ្នាំ​នេះ​ទៅ។ ដូច្នេះ​ហើយ នាយ​ឧត្ដមសេនីយ៍ ម៉ៅ ច័ន្ទតារា អំពាវនាវ​ឲ្យ​ប្រជាពលរដ្ឋ​ប្រញាប់ប្រញាល់​មក​កែ​តម្រូវ​ទិន្នន័យ​ ដែល​សំណើ​កែ​ទាំង​នោះ​មិន​មាន​ខុស​នឹង​ស្ថានភាព​ដើម​អត្តសញ្ញាណ។ រាល់​ការ​កែ​តម្រូវ​ ប្រជាពលរដ្ឋ​ត្រូវ​យក​ឯកសារ​ឲ្យ​បាន​គ្រប់គ្រាន់​រួមមាន៖ អត្តសញ្ញាណ​បណ្ណ​ដើម, សំបុត្រ​កំណើត, សៀវភៅ​ស្នាក់​នៅ, សៀវភៅ​គ្រួសារ, ហើយ​បើ​ជា​សិស្ស​ត្រូវ​យក​សញ្ញា​បត្រ​មក​ពិនិត្យ​ ជាដើម។ «បើ​មាន​ឯកសារ​គ្រប់​គ្រាន់​ការ​កែ​តម្រូវ​កាន់តែ​បាន​លឿន»។ នាយ​ឧត្ដមសេនីយ៍ ម៉ៅ ច័ន្ទតារា​ បន្ថែម៕